بلا ملامح

ممكن نعتبر التدوينة دي بلا ملامح او بلا معالم....
زي حاجات كتير اوي بقت موجودة و بقت بتفرض نفسها فى الوقت دة على حياتنا وللاسف الحاجات دة بقت هى الاساس والاصل للحياة.

طول عمرى وانا فاشل فى الكتابة افكارى مشتتة وبلا ملامح حتى فى حياتى الشخصية ممكن تحس انى هوائى شوية .مش معنى كدة انى مليش شخصية او ماليش هدف .بس تقدر تقول ان بيجي علييا فترة ضبابية مابقاش عارف انا عايز اية تحديدا.

زي الايام الهباب اللى انا فيها حاليا . خلاص اتخنقت بجد طفح الكيل بالحياة كلها .زهقت !!! ايوة انا زهقت كرهت عيشتى .مش بطران على العيشة الحمد لله على العيشة اللى انا عايشها..بس..

بس هنا مربط الفرس زي ما بيقولوا خلاص زهقت من انى طول عمرى فى مرحلة واحدة متجمد فيها اللى هى مرحلة التعليم عايز اخلص مش قادر ابص فى حرف بعد كدة ..

متخيل حالتى بعد 6 سنين مذاكرة -6 سنين يا راجل يا طيب - خلاص نفسى اتقطع حيلى اتهد عايز اغير مكانى فى الخريطة مش عايز اقف محلك سر.

واقف فى مكانى متجمد مش عارف تحقق ولا واحد على مليون من افكاري واحلامي فى حين انا شايف كل الناس حوالين منى اللى خلص و اللى اشتغل واللى سافر و اللى خطب .

وانا لسة بعمل الواجب و بجرى عشان الحق المحاضرة و انزل اصور ورق !!!! صدقنى شعور سخيف بالعجز و القهر وصدقنى قتل حاجات كتير جوايا كان نفسى اعملها قتل احلام كتير حلوة ومش شرط قتلها وبس وخلى الاحلام التانية بقت مهددة بالانقراض.

كان نفسى اسافر برة اكمل دراسة -ماسترز و دكتوراة - كان نفسى فى كدة بس بعد اللى وصلت ليه من حالات الاكتئاب الحلم دة اتاجل لمدة لاتقل عن 5 سنين.

اه افتكرت انا مش مسموح لييا انى افكر او احلم فى خارج نطاق معين حاليا -اللى هو نطاق البكالوريوس-
ممنوع انك تفكر انك ترتبط بحد!!! لية مش وقته يا ابنى مع ان دة انسب وقت ليه وانت لسة بتبدى حياتك مش وانت بتنهيها!!! فكر رومانسى شوية لا مكان ليه فى الوقت دة..

شعور انك متكتف بحاجة اكبر منك ومش عارف تعمل اية عشان تحرر نفسك من التكتيف دة شعور غبي !!!
ما انا زي ما قولتلك الاول انا عايش فى عصر انتهى وغالبا عايش فيه لوحدى

من انا

السؤال دة المفروض كل شخص يسأله لنفسه. مين انا؟؟

كتير سألت نفسى السؤال دة وللأسف ما وصلتش لأجابة مقنعة !!! فأنا يا سادة شخص عادي جدا لدرجة تقهرك ...
اه والله حتحس انك حتشل من كتر ما انا شخص عادي مش مصدقين طبعا واحلفكم بالله انى ولا انا كمان

يعنى انا اهتماماتى كلها عادية جدا.ما مفيش شئ مميز فى حياتى .من عامة الشعب فى الدفعة يعنى لا بتاع امتيازات و لا موس وهارى نفسى كتب ومراجع و لا حبيب الدكاترة وبتناقش معاهم فى مشكلة الشرق الاوسط اللا محدود

ولا انا مقضيها ومكبر دماغى و منفض للتعليم !!! انا الشخص اللى بيمثل الحالة اللى فى النص . حاجة تقهر

خد على كدة فى كل حاجة فى حياتى . لسة عايش فى فترة ماتت من زمان عند ناس كتير.للأسف انا تقريبا الوحيد اللى عايش فيها.

ومن هنا حبدأ كلامى عن ان انا وحيد-مش معنى كدة انى قطوع من شجرة واقعد اسبل فى عيني عشان حضرتك تتعطف علييا-

انا حاسس انى لوحدى الأيام دة .مفتقد حاجات كتير .وبعدين انا اكتشفت من فترة انى الاحساس دة عندي من زمان..

مش عارف لية يمكن عشان اتفرطنا من بعض كل واحد فينا راح والدنيا خدته ومشى فى سكة بعيدة اوي عن التانى
يمكن عشان مفيش حد فى حياتى -بأعتبار ان الانسان حيوان اجتماعى لازم له من شخص اخر يتعايش معاه-
يمكن لأنى محدش فاهمنى ولا حاسس بييا
انا مش عارف فى اية ؟؟!! بس اللى اعرفه انى عمرى ما كنت اتخيل انى اقعد اكتب الكلام دة.بس للضرورة احكام زي ما حضرتكوا عارفين .

حاسس انى عايش لوحدي بالرغم من كل الناس اللى اعرفها -ربنا يخليهم لييا- بس مش كفاية !!!
ودة يخلص حل المشكلة فى حاجة واحدة . انى محتاج حد معايا فى حياتى ودة شعور طبيعي جدا وازاي مكنتش حاسس بالشعور دة يبقى فى حاجة غلط فى مخى.

المشكلة ان انا لاقى اللى يكملنى .احساس فظيع بالوحدة .الناس بقت .......... غريبة .ولا انا اللى بقيت غريب.

مش عارف!!

بس صدقنى ان شعور Stand alone شعور سخيف احساس انك لوحدك احساس ان موبايلك ممكن يقعد باليومين ما بيرنش!!!!!