ما قبل الرحيل

بعد غياب طويييييييييييييييييييييييييييييييييييييييييييييييل عن الكتابة اجد نفسى اعود مرة اخرى للكتابة و هذة المرة تختلف كليا عن اي مرة سابقة ليها .
المرة دي بكتب قبل الرحيل -متخافوش يا ولاد انا مش حموت انا رايح البى نداء الوطن - قبل مرور 8 ايام فقط على الترحيل الى كلية ظباط احتياط فى فايد
يمكن عشان كدة حيبقى بوست النهاردة مختلف شويتين و طويل تلات شويات عشان انا حاسس بحاجات كتير جدا و عشان كمان اسيبلكوا بصمة تفتكرونى بيها وانا فى الصحرا.

اولا انا حاليا بعيش حالة اكتئاب غير طبيعية - ربنا يديمها نعمة على شعبنا الغلبان - و الاكتئاب دة مش معناه انى منطوى ولا سايب دقنى ولا بقطع فى هدومى مش عشان انا عاقل لا سمح الله بس عشان اللى عايشه دلوقتى و الحمد لله عدا المرة دي بكتييييييييييييييييييييييييييييييييييير اوي

حاسس بوحدة غير طبيعية مع انى يا اخى الحمد لله معارفى بعدد طوب و زلط الارض و الحمد لله ربنا يخلي لي اخواتى و امى و اللى بحبها
طيب انا حاسس كدة بوحدة ليه !!! ماهو حاجة فعلا تخليك تستغرب انا لية حاسس زي الشمندورة دى مش عارف حاسس انا فى وادى و العالم فى وادى تانى خالص و مفيش اي نقطة نتلاقى فيها بكدة بس بجد انا حاسس بوحدة غير طبيعية يمكن عشان الترحيل كمان اسبوع و بجهز نفسى ولا عشان الاسباب اللى حقولها بعدين

انا من الناس اللى ربنا ابتلاهم بعيب خطير جدا ان انا مش بعرف ابين مشاعرى كويس يعنى مش عارف لية الموضوع دة سبب لييا ازمة و لسة بعيشها لحد دلوقتى مع وفاة والدى الله يرحمه انى ماكنتش مبين ليه مشاعرى كويس و ندمت و لسة بندم مع كل صبح بيعدي علييا انى مابينش انا بحبه اد اية

قياسا ان الانسان حيوان فانا حضرتك من اكبر البهايم فى الدنيا عشان ما اتعلمتش من غلطتى اللى قولتها فوق و لسة برضة مش مبين ان اهلى حيوحشنى و انى بتعذب كل يوم بيمر و انا حبعد عنهم وان انا بموت كل يوم انى مش بقعد معاهم كفاية و ان بتمنى ان اللحظة ترجع عشان اقعد معاه وقت اكتر .

يمكن عشان شايف ان عمرى بيتسرق منى بطريقة شيك - اشوفكم 2012 !!!-
يمكن عشان انا حاسس انى زي الراجل المحبوس دة وان احلامى كلها انتقلت من خانة طالب فى الكلية الى خانة فى الجيش ولاتزال تحت قيد عدم التنفيذ
ولا يمكن عشان هى معايا واحد هناك بيسال طيب وانت مش كنت بتتمنى انها تبقى معاك اقوله اه كنت ولسة و حفضل اتمنى دة بس انك تحس انك عاجز عن تحقيق ابسط الاحلام ليها صدقنى دة حيخيليك تحس باكتر من اللى حاسس بيه

ولا عشان الكلام العاقل السليم ولاعشان اية بالظبط !!!!!! صدقنى انا مش عارف الاسباب كتير و ملاحق اكتب
على العموم حبقى افتكركوا من فايد

Spark

حدخل فى الموضوع على طول عشان الساعة 4 الفجر دلوقتى وعايز انام طحن
طيب بتكلم لية ما استنى للصبح - المشكلة انك عارف انى بنى ادم كسول - يعنى لو قولت حكتب بكرة يبقى مش حكتب فى السنة دي اصلا -
ولازم اكتب عشان خلاص بقى ....

القصة كالتالى
فاكر فى البوست القديم لما قولتلك انى بحب واحدة وخلاص وصلت لمرحلة انى بعد النجوم-راجع البوست القديم شكلك مش مذاكر وحتتعبنا معاك-

القصة قابلتها شوية حاجات بسيطة وشرفك نسيت اذكرها

الاحد -حاسس بنخز فى قلبي و منشار فى دماغى و حاسس بانى حودع بدري بدرى
الاتنين نفس الاعراض -يمكن صدفة
التلات - سبحان الله هى هى الاعراض اكيد صدفة

طبعا العبد لله من اكتر مخاليق ربنا اللى ممكن يطنشوا المشوار بتاع الدكتور -مش بحب ريحتهم ولا القعدة عشان مستنى رقمى فى الكشف
من الاخر طنشت

طيب السوال بقى اللى قبل كل دة -هو انت لية حسيت بكدة ؟؟!!!

الاجابة بسيطة يا اسطى ......

واحد بيحرق كل يوم تقريبا 6 احجار معسل - الحجر بجنيه دلوقتى يا غجر وعشان كدة نويت اتجه لتدخين الغليون-
واحد دمه محروق على حال البلد واللى بيحصل فيها
واحد دمه محروق برضةعلى مشروع التخرج بتاعه واللى بيتعمل فيه-فى الشخص وليس المشروع-
سبحان الله نفس الواحد دة بيسال نفسه اية اللى حيحصل كمان 120 يوم- فترة انتهائى من التعليم -نظرا لانها مرة غامضة الملامح - يعنى ضباببية شوية

شوية اسئلة بسيطة تانية -ظريفة خالص الاسئلة دى -
الجيش انا موقفى اية من الاعراب ؟؟ لييا ولا مش لييا ؟؟ طب 3 سنين ولا سنة

الشغل حشتغل فين وبكام ومع مين والاهم من كل دة هل انا مؤهل انى ابقى مهندس كويس ولا فشتك ؟؟
هى بتتنيل بتحبنى ولا لأ ؟؟ وصلها اللى فى قلبي ولا انا مانجحت فى اختبار الهيئة - اعتقد دلوقتى ممكن اجاوب على السؤال دة

تخيل يا ابنى ويا ابنتى كل دة فى نفس واحد فى وقت واحد لنفس الشخص اللى سبحان الله لسة عايش وبيكتبلك

طبيعي يحصل نوع من الانهيار واثر الكلام دة علييا يوم الجمعة -مانزلتش للصلاة ما قدرتش اقوم من السرير اصلا -

هل هى بداية النهاية ؟؟كنت حاسس انى حموت صغير من زمان

عموما مش دة موضوعنا اللى عايز اقولك فيه كل الدش والعك اللى فوق دة عشان ابين ليك حالتى النفسية اللى زي الهباب...

موضوعنا اللى جاي

فى الفترة اللى زي دي بيبقى الواحد ماشى كانة اعمى مش شايف اصلا اية اللى قدامه مش شايف كف ايديه بس من رحمة ربنا بينا انه بيعتلك اشارات او اسباركات تنور ليك الدنيا عشان تعرف تشمى وتكمل طريقك

الاسباركات دي اتبعتلى ونويت اكمل طريقى

فيا هبة - بالرغم من انك دمياطية - ويا يفرلى - بالرغم من انك امريكية و يا كارين بالغم من انك جلاسكوية -من جلاسكو يعنى -

ويا بهجت و يا جلال و يا ناس كتيييييييييييييييييييييييييييييييييييييييييييييييييييييييييييييييييييييييييير اوي بحمد ربنا سبحانه وتعالى انه بعتهم لييا فى الوقت المناسب

بشكركم انكم كنتوا اسباركات نورت لييا حياتى
اتشرفت بمعرفتكم جدا

For you

this note is to you and only you.

May be it sound crazy, may be it sound strange.... but i think that i have never been in love before meeting you.

from the 1st moment i talked to you, you took my heart , my soul -actually you took me.
you know-
never met a person like you before and i think i will never meet some one like you again.

i know that we didn't know each other for enough time but...
i met you before... in my dreams, i saw you in my dreams and this dream is like touching the stars. Never want to walk up from this dream and always want to live in this dream
now i have only one dream to be with you..

you can say NO and you can say Yes but you can't make me stop loving you..

hope one day that you know this and say yes ..

بحلم

مش عارف اكتب عن اية بس عايز اكتب وخلاص
شعور غريب !!! عايز اقعد اتكلم وخلاص تسمعنى ولا ماتسمعنيش بس عايز اطلع اللى جوايا.

بتقول اتكلم حاضر يا سيدي بس انت اللى جبته لنفسك

ابدا منين ابدا منين اه من حتة المشاعر و الرومانسية دة بسبب .... ايوة الزلانتين - اسم الله على مقامك - وكل سنة وانت زلانتين صغير يا راجل يا طيب - الله يسميها بالخير بقى مى كساب فى تامر وشوقية

حاسس انى داخل على تجربة جديدة و اتمنى انها ما تبقاش زي غيرها من القدام عشان المشرحة مش ناقصة و بالصلاة على النبي

عارف انك بتقول ان اسلوب الكلام دة ماينفعش تتكلم بيه عن حاجة حساسة زي المشاعر بس اعمل اية من غلبي

كل مرة لازم تحصل حاجة

يا انا ماابقاش مناسب ليها - مش عارف لية - هى مش مناسبة لييا مش عارف لية او تبقى هى بتتسلى برضة بدون ذكر اسباب

او شايفانى فرصة سهلة تلعب عليه شوية -قال فاكرة نفسها هند رستم يعنى وانا قفل لسة جاي من البلد طازة بالصدأ اللى عليه-

او تقتل اللى جوانا من حاجات حلوة عشان هى بتحب التملك و بتحب السيطرة

تعبت بجد!!!

لحد ما اتكلمت معاها !!! عن طريق الصدفة
اية كل دة يا اخى دة انا كنت بعرف صول جيش قبل كدة !!! مش عارف كميات الرقة و الذوق اللى عندها ترشحها لانها تبقى ملاك نازل من السما.

مش عارف خايف احسن تبقى زي غيرها -مش قصدى اقارنها بحد طبعا بس خايف انها تبقى تجربة مش ناجحة- ولهذا يلزم التروى و الحذر
ما انا قولتلك قبل كدة المشرحة مش ناقصة قتلى ...

بس بجد نفسى الموضوع يمشى على خير مش عارف لية يمكن عشان ماقابلتش فى حياتى حد زيها يمكن عشان هى ارق واحدة انا اتكلمت معاها فى حياتى !!!يمكن عشان لقيتها شبهى فى كل حاجة بقولها او بفكر فيها !!!

مش عارف يا اخى بس حاسس انى وقعت على بوزى و لاول مرة ابقى مبسوط بكدة

مستنى الايام الجاية توضح هى بتفكر ازاي عايز اعرفها اكتر من كدة ..

عموما دة بالنسبة للمشاعر بالنسبة للشغل فاضلى اقل من 132 يوم فى التعليم

خلاص حاسس انى زي المارد المحبوس فى قمم و خلاص قرب ياخد افراج !!! كفارة يا ابو عفاف....
تصدق و تؤمن بالله انا بحسبهم بالساعة خلاص نفسى المرحلة دي تخلص بقى بحلوها بمرها بكل حاجة فيها . عايز ادخل على المرحلة الجاية ابدا اشق حياتى و اشوف انا فى الدنيا دي مكانى فين

بحلم بحاجات كتيرة اوي !!! بحلم كل يوم بمستقبل لازم يتشق بمستوي لازم اوصله

عارف ان الدنيا مش بتدى كل حاجة انت بتحلم بيها بس للاسف لازم احلم والا حموت - على راي محمد منير لو بطلنا نحلم -
ولذلك انا بالرغم انى مش متاكد من مشاعرها ناحيتي و بالرغم انا متخوف من بكرة جدا عشان مش حستحمل صدمة جديدة مش عشان انا صعيف ولا لسة مراهق بس لان صدمة جديدة حتكسر كل مبادى حلوة لسة جوايا و حتطلع جوايا واحد ما يعرفش يعنى اية اصلا مشاعر

عارف انت لما تفضل تكسر فى قزاز و مرة واحدة حتلاقى حتة قزاز صغيرة مش عارف تكسرها و بس لكن ممكن تجرحك كمان !!! متخيل انا لو حصل حاجة ممكن اوصل لاية !!!!

بالرغم من كل العك اللى تم ذكره اعلاه بس بحلم وهى جنبي
بحلم وهى مشاركانى بكرة !!! انا عايز كدة بجد انا عايزهاه تفضل معايا على طول

طولت عليك انا عارف و شكلك بتبص فى ساعتك وعايز تمشى وراك معياد مع مدحت انا عارف
صدعتك معلش بس انا قولتلك انا عايز اتكلم كتير اوي عشان انا اتمليت وعايز اهدي يلا اشوفك على خير

عاجل - السنوية الاولى لوالدي رحمه الله

انا بكتب ليك وانا متاكد انك ان شاء الله فى مكان احسن كتير اوي من اللى احنا فيه . بكتب ليك وانا بدعى ربنا انك
تبقى فى الجنة وان شاء الله انا متقين من الدعوة دي.

انا بكتب ليك عشان اقولك شوية حاجات مهمة اوي:
اولا انت وحشتنى جدا .بجد انا حاسس انى ضايع مش متخيل حكمل باقى حياتىازاي!!!
انا من شهر 9 اللى فات مش بنام مش قادر افكر مش عارف اشتغل مش قادر اعمل اي حاجة حاسس انى زي المدبوح .
2. انا بعتذرلك عن كل حاجة صدرت منى و ضايقتك .بعتذر لك عشان ماكنتش فاهمك ولا فاهم انت باصص لاية.
على فكرة كل حاجة انت قولت عليها كانت صح وانت عندك حق فيها !!!
بس انا اللى ماكنتش شايف كويس



3. عايز اشكرك على اللى انت عملته معايا لو فى فضل لبني ادم علييا فيبقى فضلك و لو فى حد لازم اشكره على فضله بعد ربنا يبقى انت
4. لو انا وصلت للى انت حلمت تشوفنى فيه فاعرف ان الفضل دة -بعد فضل ربنا يبقى فضلك انت.ولو ماوصلتش للى انت حلمت بيه لييا فاعرف انك مقصرتش فى حاجة خالص !!! التقصير منى انا .


5.انا بعاهدك قدام ربنا سبحانه وتعالى ان اوصل للى انت حلمت بيه لييا واكون حاجة تشرفك

وتستحق انها تشيل اسمك

اخر حاجة -وحشتنى

الله يرحمك

بلا ملامح

ممكن نعتبر التدوينة دي بلا ملامح او بلا معالم....
زي حاجات كتير اوي بقت موجودة و بقت بتفرض نفسها فى الوقت دة على حياتنا وللاسف الحاجات دة بقت هى الاساس والاصل للحياة.

طول عمرى وانا فاشل فى الكتابة افكارى مشتتة وبلا ملامح حتى فى حياتى الشخصية ممكن تحس انى هوائى شوية .مش معنى كدة انى مليش شخصية او ماليش هدف .بس تقدر تقول ان بيجي علييا فترة ضبابية مابقاش عارف انا عايز اية تحديدا.

زي الايام الهباب اللى انا فيها حاليا . خلاص اتخنقت بجد طفح الكيل بالحياة كلها .زهقت !!! ايوة انا زهقت كرهت عيشتى .مش بطران على العيشة الحمد لله على العيشة اللى انا عايشها..بس..

بس هنا مربط الفرس زي ما بيقولوا خلاص زهقت من انى طول عمرى فى مرحلة واحدة متجمد فيها اللى هى مرحلة التعليم عايز اخلص مش قادر ابص فى حرف بعد كدة ..

متخيل حالتى بعد 6 سنين مذاكرة -6 سنين يا راجل يا طيب - خلاص نفسى اتقطع حيلى اتهد عايز اغير مكانى فى الخريطة مش عايز اقف محلك سر.

واقف فى مكانى متجمد مش عارف تحقق ولا واحد على مليون من افكاري واحلامي فى حين انا شايف كل الناس حوالين منى اللى خلص و اللى اشتغل واللى سافر و اللى خطب .

وانا لسة بعمل الواجب و بجرى عشان الحق المحاضرة و انزل اصور ورق !!!! صدقنى شعور سخيف بالعجز و القهر وصدقنى قتل حاجات كتير جوايا كان نفسى اعملها قتل احلام كتير حلوة ومش شرط قتلها وبس وخلى الاحلام التانية بقت مهددة بالانقراض.

كان نفسى اسافر برة اكمل دراسة -ماسترز و دكتوراة - كان نفسى فى كدة بس بعد اللى وصلت ليه من حالات الاكتئاب الحلم دة اتاجل لمدة لاتقل عن 5 سنين.

اه افتكرت انا مش مسموح لييا انى افكر او احلم فى خارج نطاق معين حاليا -اللى هو نطاق البكالوريوس-
ممنوع انك تفكر انك ترتبط بحد!!! لية مش وقته يا ابنى مع ان دة انسب وقت ليه وانت لسة بتبدى حياتك مش وانت بتنهيها!!! فكر رومانسى شوية لا مكان ليه فى الوقت دة..

شعور انك متكتف بحاجة اكبر منك ومش عارف تعمل اية عشان تحرر نفسك من التكتيف دة شعور غبي !!!
ما انا زي ما قولتلك الاول انا عايش فى عصر انتهى وغالبا عايش فيه لوحدى

من انا

السؤال دة المفروض كل شخص يسأله لنفسه. مين انا؟؟

كتير سألت نفسى السؤال دة وللأسف ما وصلتش لأجابة مقنعة !!! فأنا يا سادة شخص عادي جدا لدرجة تقهرك ...
اه والله حتحس انك حتشل من كتر ما انا شخص عادي مش مصدقين طبعا واحلفكم بالله انى ولا انا كمان

يعنى انا اهتماماتى كلها عادية جدا.ما مفيش شئ مميز فى حياتى .من عامة الشعب فى الدفعة يعنى لا بتاع امتيازات و لا موس وهارى نفسى كتب ومراجع و لا حبيب الدكاترة وبتناقش معاهم فى مشكلة الشرق الاوسط اللا محدود

ولا انا مقضيها ومكبر دماغى و منفض للتعليم !!! انا الشخص اللى بيمثل الحالة اللى فى النص . حاجة تقهر

خد على كدة فى كل حاجة فى حياتى . لسة عايش فى فترة ماتت من زمان عند ناس كتير.للأسف انا تقريبا الوحيد اللى عايش فيها.

ومن هنا حبدأ كلامى عن ان انا وحيد-مش معنى كدة انى قطوع من شجرة واقعد اسبل فى عيني عشان حضرتك تتعطف علييا-

انا حاسس انى لوحدى الأيام دة .مفتقد حاجات كتير .وبعدين انا اكتشفت من فترة انى الاحساس دة عندي من زمان..

مش عارف لية يمكن عشان اتفرطنا من بعض كل واحد فينا راح والدنيا خدته ومشى فى سكة بعيدة اوي عن التانى
يمكن عشان مفيش حد فى حياتى -بأعتبار ان الانسان حيوان اجتماعى لازم له من شخص اخر يتعايش معاه-
يمكن لأنى محدش فاهمنى ولا حاسس بييا
انا مش عارف فى اية ؟؟!! بس اللى اعرفه انى عمرى ما كنت اتخيل انى اقعد اكتب الكلام دة.بس للضرورة احكام زي ما حضرتكوا عارفين .

حاسس انى عايش لوحدي بالرغم من كل الناس اللى اعرفها -ربنا يخليهم لييا- بس مش كفاية !!!
ودة يخلص حل المشكلة فى حاجة واحدة . انى محتاج حد معايا فى حياتى ودة شعور طبيعي جدا وازاي مكنتش حاسس بالشعور دة يبقى فى حاجة غلط فى مخى.

المشكلة ان انا لاقى اللى يكملنى .احساس فظيع بالوحدة .الناس بقت .......... غريبة .ولا انا اللى بقيت غريب.

مش عارف!!

بس صدقنى ان شعور Stand alone شعور سخيف احساس انك لوحدك احساس ان موبايلك ممكن يقعد باليومين ما بيرنش!!!!!